ប្រការ ១ .-
គណបក្សនយោបាយនេះមានឈ្មោះថា “គណបក្សប្រជាធិបតេយ្យមូលដ្ឋាន” ជាភាសាអង់គ្លេស “Grassroots Democratic Party” សរសេរអក្សរកាត់ជាភាសាខ្មែរ “គ.ប.ម.” និងជាភាសាអង់គ្លេស “GDP”។

ប្រការ ២ .-
គណបក្សប្រជាធិបតេយ្យមូលដ្ឋាន មានសញ្ញាសម្គាល់ត្រីកោណ តំណាងឱ្យ ប្រជាធិបតេយ្យពីក្រោមមកលើ យកមូលដ្ឋានជាធំ ដែលមានផ្ទៃខាងក្នុងពណ៌បៃតង ជ្រុងបាតពណ៌ក្រហម ជ្រុងទាំងសងខាងពណ៌ខៀវ និងអក្សរ “គ ប ម” ពណ៌សនៅចំកណ្តាលផ្ទៃទាំងមូល។ ពណ៌បៃតង តំណាងឱ្យ “ធម្មជាតិ កសិកម្ម និងប្រជាធិបតេយ្យមូលដ្ឋាន”, ពណ៌ក្រហម តំណាងឱ្យ “ការតស៊ូ ព្យាយាម និងយុត្តិធម៌”, ពណ៌ខៀវ តំណាងឱ្យ “សិទ្ធិ សេរីភាព និងច្បាប់”, ពណ៌ស តំណាងឱ្យ “តម្លាភាព ស្មោះត្រង់ និងសុចរិតភាព”។

ប្រការ ៣ .-
បាវចនា និងគុណតម្លៃរបស់គណបក្សប្រជាធិបតេយ្យមូលដ្ឋាន គឺ សាមគ្គីភាព យុត្តិធម៌ អហិង្សា។

ប្រការ ៤ .-
គណបក្សប្រជាធិបតេយ្យមូលដ្ឋាន កំណត់យកថ្ងៃបង្កើតគណបក្សជាផ្លូវការ នៅថ្ងៃទី០២ ខែសីហា ឆ្នាំ២០១៥ ជាថ្ងៃដែលអ្នកស្រលាញ់ប្រជាធិបតេយ្យបែបវិមជ្ឈការ មកពីឃុំ-សង្កាត់ចំនួន១០ និងបណ្តាញសង្គមខ្មែរដើម្បីខ្មែរ បានផ្ដួចផ្តើមគំនិតបង្កើតគណបក្សនយោបាយមួយ តាមរយៈសមាជដំបូង ដើម្បីអនុម័តលើឯកសារគោល និងបោះឆ្នោតជ្រើសរើសគណៈកម្មាធិការ បណ្តោះអាសន្ន។

ប្រការ ៥ .-
ទីស្នាក់ការកណ្តាលគណបក្សប្រជាធិបតេយមូលដ្ឋាន តាំងនៅផ្ទះលេខ៣៨, ផ្លូវ១៩៧២, ភូមិពោងពាយ, សង្កាត់ភ្នំពេញថ្មី, ខណ្ឌសែនសុខ, រាជធានីភ្នំពេញ។ ទីស្នាក់ការនេះអាចផ្លាស់ប្ដូរទៅតាំងនៅទីកន្លែងផ្សេងទៀតបាន តាមការសម្រេចរបស់គណៈកម្មាធិការនាយក។

គណបក្សអាចបើកទីស្នាក់ការដែលជាសាខានៅរាជធានី ខេត្ត ក្រុង ស្រុក ខណ្ឌ ឃុំសង្កាត់ និងភូមិ ទូទាំងប្រទេសកម្ពុជា និងមានសាខានៅតាមប្រទេសនានាលើសកលលោក។

ប្រការ ៦ ថ្មី.-(១)
គណបក្សប្រជាធិបតេយ្យមូលដ្ឋាន ប្រព្រឹត្តទៅក្នុងក្របខណ្ឌនៃរដ្ឋធម្មនុញ្ញ និងច្បាប់ ស្តីពីគណបក្សនយោបាយនៃព្រះរាជាណាចក្រកម្ពុជា គោរពគោលការណ៍នៃលទ្ធិប្រជាធិប តេយ្យ សេរីពហុបក្ស។ គណបក្សប្រជាធិបតេយ្យមូលដ្ឋាន អាចធ្វើសម័្ពន្ធភាពទ្វេភាគី ឬពហុភាគីបាន។

ប្រការ ៧.-
ទស្សនវិស័យរបស់គណបក្សប្រជាធិបតេយ្យមូលដ្ឋានគឺ “ប្រជាពលរដ្ឋរស់នៅមានជីវិតថ្លៃថ្នូរ និងប្រទេសជាតិមានអធិបតេយ្យពេញលេញ”។

ប្រការ ៨ .-
បេសកកម្មរបស់គណបក្សប្រជាធិបតេយ្យមូលដ្ឋានគឺ “បណ្តុះអ្នកដឹកនាំល្អ និងកសាងមូលដ្ឋានគ្រឹះប្រជាធិបតេយ្យទូទាំងប្រទេស”។

ប្រការ ៩ .-
គណបក្សប្រជាធិបតេយ្យមូលដ្ឋានមានគោលនយោបាយដូចតទៅ ៖

1. គោរព និងលើកកម្ពស់សិទ្ធិសេរីភាព និងជីវភាពរស់នៅរបស់ប្រជាពលរដ្ឋ
2. ប្រកាន់យករបបសេដ្ឋកិច្ចទីផ្សារសេរី ដោយយកចិត្តទុកដាក់គាំទ្រសហគ្រាស ខ្នាតតូច និងមធ្យម
3. វិមជ្ឈការអំណាច និងធនធានដល់ថ្នាក់ក្រោមជាតិ
4. ពង្រឹងប្រព័ន្ធអភិបាលកិច្ចល្អពីថ្នាក់ក្រោមជាតិដល់ថ្នាក់ជាតិ
5. ការពារបូរណភាពដែនដី និងអធិបតេយ្យភាពរបស់កម្ពុជា
6. អភិរក្ស ការពារ និងស្តារធនធានធម្មជាតិ
7. ពង្រឹង និងពង្រីកតួនាទីអង្គការសង្គមស៊ីវិល ក្នុងការឃ្លាំមើលសិទ្ធិមនុស្ស តស៊ូមតិ និងជួយផ្តល់សេវាសង្គម
8. អភិវឌ្ឍធនធានមនុស្សតាមរយៈវិស័យអប់រំ សុខាភិបាល និងបណ្តុះបណ្តាល ជំនាញ។

ប្រការ ១០.-
គណបក្សប្រជាធិបតេយ្យមូលដ្ឋានមានគោលការណ៍គ្រឹះដូចតទៅ ៖

1. ស្ម័គ្រចិត្ត និងបើកចំហក្នុងការចូលជាសមាជិកភាព
2. សមាជិកាធិបតេយ្យ (ប្រជាធិបតេយ្យផ្ទៃក្នុងបក្ស)
3. ប្រជាធិបតេយ្យបែបវិមជ្ឈការ
4. អ្នកដឹកនាំខាងលើដើរតួនាទីជាអ្នកសម្របសម្រួល និងពង្រឹងសមត្ថភាពសមាជិក និងប្រជាពលរដ្ឋទូទៅ
5. ភាពជាម្ចាស់ ជាពិសេសស្វ័យភាពហិរញ្ញវត្ថុ
6. ផ្តល់ឱកាសស្មើគ្នាចំពោះបុរស ស្រ្តី និងយុវជន ក្នុងរចនាសម្ព័ន្ធដឹកនាំ និងការសម្រេចចិត្តផ្សេងៗ។

ប្រការ ១១ .-
ពលរដ្ឋកម្ពុជាទាំងអស់ដែលមានអាយុចាប់ពី ១៨ឆ្នាំ ឡើងទៅអាចចូលជាសមាជិក គណបក្សប្រជាធិបតេយ្យមូលដ្ឋានបាន។ បែបបទនៃការសុំចូលជាសមាជិក មានចែងក្នុង បទបញ្ជាផ្ទៃក្នុងរបស់គណបក្ស។

ប្រការ ១២ .-
គណបក្សប្រជាធិបតេយ្យមូលដ្ឋាន អនុវត្តតាមគោលការណ៍សមាជិកាធិបតេយ្យ មានន័យថា យកសមាជិកជាធំ។ ភាពរឹងមាំ និងរីកចម្រើនរបស់គណបក្ស អាស្រ័យលើការចូលរួមរបស់សមាជិក ក្នុងការពង្រឹង និងពង្រីកគណបក្ស។

ប្រការ ១៣ .-
សមាជិករបស់គណបក្សប្រជាធិបតេយ្យមូលដ្ឋាន មានពីរប្រភេទ ៖
– សមាជិកជំហរ
– សមាជិកគាំទ្រ
សមាជិកទាំងអស់ត្រូវគោរព និងដើរតាមគោលការណ៍រួមរបស់គណបក្សប្រជាធិបតេយ្យមូលដ្ឋាន។

ប្រការ ១៤ .-
សមាជិកជំហរចូលរួមប្រជុំ និងចូលរួមសកម្មភាពរបស់គណបក្សដោយទៀងទាត់ និងមានសិទ្ធិឈរឈ្មោះឱ្យគេបោះឆ្នោត។

ប្រការ ១៥ .-
សមាជិកគាំទ្រចូលរួមប្រជុំ និងចូលរួមសកម្មភាពរបស់គណបក្សខ្លះៗ និងមានសិទ្ធិបោះឆ្នោតជ្រើសរើសតំណាងរបស់ខ្លួន។

ប្រការ ១៦ .-
សមាជិកគណបក្សអាចបាត់បង់សមាជិកភាពរបស់ខ្លួនដោយ ៖
– មរណភាព
– ការសុំលាលែងជាលាយលក្ខណ៍អក្សរ ដាក់ជូនប្រធានគណៈកម្មាធិការឃុំ-សង្កាត់ ឬអគ្គលេខាធិការដ្ឋាន
– ការបញ្ចប់សមាជិកភាពពីគណបក្ស។

ប្រការ ១៧ .-
សមាជិកជំហររបស់គណបក្សប្រជាធិបតេយ្យមូលដ្ឋានមានសិទ្ធិដូចតទៅ ៖

• បោះឆ្នោតជ្រើសរើសតំណាងគ្រប់លំដាប់ថ្នាក់ក្នុង​រចនាសម្ព័ន្ធ​ដឹកនាំ​គណបក្ស
• ឈរឈ្មោះ​ឱ្យគេបោះ​ឆ្នោត​ជាតំណាង​គ្រប់​លំដាប់​ថ្នាក់ ​ក្នុង​រចនា​សម្ព័ន្ធ​ដឹកនាំគណបក្ស
• ចូលរួម​ក្នុង​ការសម្រេច​ចិត្ត​ផ្សេងៗ​របស់​គណបក្ស
• ចូលរួម​តាម​ដាន បញ្ចេញ​មតិ​យោបល់ និងវាយ​តម្លៃ​ការងារ​របស់​គណបក្ស។

សមាជិក​ជំហរ​របស់​គណបក្សប្រជាធិបតេយ្យ​មូលដ្ឋាន​មាន​កាតព្វ​កិច្ច​ដូច​តទៅ ៖

• ឆ្នោតជ្រើសរើសតំណាងគ្រប់លំដាប់ថ្នាក់ក្នុង​រចនាសម្ព័ន្ធ​ដឹកនាំ​គណបក្ស
• យល់​ដឹង និងផ្សព្វផ្សាយ​គោល​ការណ៍ គបម និង​ជួយ​ស្វែង​រក​សមាជិក​បន្ថែម
• បង់​ប្រាក់​សមាជិក​ភាព គបម ទៀងទាត់
• ចូល​រួម​ប្រជុំ និង​សកម្មភាព​ផ្សេងៗ​របស់ គបម ដោយ​ទៀងទាត់។

ប្រការ ១៨ ._–
សមាជិកគាំទ្ររបស់គណបក្សប្រជាធិបតេយ្យមូលដ្ឋានមានកាតព្វកិច្ចដូចតទៅ ៖

• បោះឆ្នោត​ជ្រើស​រើស​តំណាង​​គ្រប់​លំដាប់​ថ្នាក់​ក្នុង​រចនា​សម្ព័ន្ធ​ដឹកនាំគណបក្ស​
• ទទួល​ព័ត៌មានផ្សេងៗ និងផ្តល់យោបល់
• ចូលរួម​ក្នុងការ​សម្រេច​ចិត្តផ្សេងៗ​របស់​គណបក្ស​នៅមូលដ្ឋាន
• អាច​ចូលរួម​តាមដាន​ដំណើរ​ការ​របស់​គណបក្ស។

សមាជិក​គាំទ្ររបស់គណបក្សប្រជាធិបតេយ្យមូលដ្ឋានមានកាតព្វកិច្ចដូចតទៅ ៖

• យល់ដឹង និងផ្សព្វផ្សាយគោលការណ៍គណបក្ស
• បង់ប្រាក់សមាជិកភាពគណបក្សទៀងទាត់
• ចូលរួមប្រជុំ និងចូលរួមសកម្មភាពរបស់គណបក្សខ្លះៗ។

ប្រការ ១៩ .-
សិទ្ធិរបស់សមាជិកជំហរ ឬសមាជិកគាំទ្រអាចត្រូវបានដកចេញ ក្នុងករណីសមាជិកណាម្នាក់មិនបានបំពេញកាតព្វកិច្ចបានត្រឹមត្រូវ។ ការដកសិទ្ធិរបស់សមាជិកមានចែងក្នុង បទបញ្ជាផ្ទៃក្នុង។

ប្រការ ២០ .-
សមាជិកណាម្នាក់ អាចនឹងត្រូវបាត់សមាជិកភាព ក្នុងករណីរំលោភធ្ងន់ធ្ងរដល់គោលការណ៍រួមរបស់គណបក្ស។ នីតិវិធីនៃការបញ្ចប់សមាជិកភាពមានចែងក្នុងបទបញ្ជាផ្ទៃក្នុង។

ប្រការ ២១ ._–
ក.គណបក្ស​ប្រជាធិបតេយ្យ​មូលដ្ឋាន​មាន​រចនា​សម្ព័ន្ធ​ដឹកនាំ​ដូច​តទៅ ៖

• ក.១.ថ្នាក់ជាតិ
  • សមាជជាតិ
  • គណៈកម្មាធិការនាយក
  • ប្រធានគណបក្ស ជាប្រធានគណៈកម្មាធិការប្រតិបត្តិ
  • គណៈកម្មាធិការដោះស្រាយវិវាទ និងវិន័យ
  • គណៈកម្មាធិការសម្របសម្រួល

• ក.២.ថ្នាក់ក្រោមជាតិ
  • សមាជថ្នាក់ក្រោមជាតិ
  • គណៈកមា្មធិការប្រតិបត្តិថ្នាក់ក្រោមជាតិ
  • គណៈកម្មាធិការដោះស្រាយវិវាទ និងវិន័យ ថ្នាក់រាជធានី ខេត្ត។

ខ.ចំនួនសមាជិក​ចាំបាច់ “កូរ៉ុម” នៃការ​រៀបចំ​សមាជ និង​កិច្ច​ប្រជុំ​គណៈកម្មាធិការ​នានា និង​ការធ្វើ​សេចក្ដី​សម្រេច ៖

• ខ.១.ការរៀប​ចំសមាជ​ជាតិ និង​ថ្នាក់​ក្រោម​ជាតិ អាច​ប្រព្រឹត្ត​ទៅ​បាន​លុះ​​ណា​​មាន​ចំនួនសមាជិក​ចាំបាច់ “កូរ៉ុម” ចូលរួម​យ៉ាង​តិច ២/៣ (ពីរភាគបី) នៃ​សមាជិក​ប្រតិភូ​ទាំង​អស់។ ការ​ធ្វើសេចក្ដី​សម្រេច​ក្នុង​សមាជ​ជាតិ និង​ថ្នាក់​ក្រោម​ជាតិ ឈរ​លើ​គោលការណ៍​យល់ស្រប​នៃ​សំឡេង​លើស​​ពី ៥០% (ហាសិប​ភាគរយ) នៃ​សមាជិក​វត្តមាន​ដែល​មាន​សិទ្ធិបោះឆ្នោត។
• ខ.២. ការ​រៀបចំ​កិច្ចប្រជុំគណៈកម្មាធិកា​រនានា អាច​ប្រព្រឹត្ត​ទៅបាន​លុះណា​​មាន​​ចំនួនសមាជិក​ចាំបាច់​ “កូរ៉ុម” ចូលរួម​យ៉ាង​តិច ៥០% (ហាសិប​ភាគរយ) នៃ​សមាជិក​ទាំង​អស់។ ការ​ធ្វើ​សេចក្ដី​សម្រេច​ក្នុង​កិច្ច​ប្រជុំ​​គណៈកម្មា​ធិការ​នានា ឈរ​លើគោលការណ៍យល់​ស្រប​នៃ​សំឡេង​​លើស​ពី ៥០% (ហាសិបភាគរយ) នៃ​សមាជិក​វត្តមាន។

ប្រការ ៤៤ ._–
ប្រភពថវិកា និងទ្រព្យសម្បត្តិរបស់គណបក្សបានមកពី ៖

1. ភាគទានសមាជិកភាព
2. ចំណូលពីការប្រាក់របស់ក្រុមសន្សំ និងការវិនិយោគស្របច្បាប់ផ្សេងៗរបស់គណបក្ស
3. វិភាគទានស្ម័គ្រចិត្តរបស់សមាជិក និងអ្នកគាំទ្រ និង
4. ចំណូលស្របច្បាប់ផ្សេងៗ។

ប្រការ ៤៥ ._–
គោលការណ៍គ្រប់គ្រងចំណូល-ចំណាយរបស់គណបក្សមានដូចតទៅ ៖

1. តម្លាភាព និងគណនេយ្យភាព
2. មានគម្រោងផែនការថវិកា និងខ្ទង់ចំណាយច្បាស់លាស់
3. គោរពតាមគោលការណ៍គ្រប់គ្រងហិរញ្ញវត្ថុ

គោលការណ៍ចំណូល-ចំណាយលម្អិត មានចែងក្នុងគោលការណ៍គ្រប់គ្រងហិរញ្ញវត្ថុរបស់គណបក្ស។

ប្រការ ៤៦ .-
គណៈកម្មាធិការនាយកមានភារកិច្ចទទួលខុសត្រូវធានានូវតម្លាភាព និងគណនេយ្យភាព ក្នុងការគ្រប់គ្រងថវិកា និងទ្រព្យសម្បត្តិរបស់គណបក្ស ដោយតម្រូវឱ្យមានរបាយការណ៍ហិរញ្ញវត្ថុទៀងទាត់ និងការធ្វើសវនកម្មរៀងរាល់ឆ្នាំ។

ប្រការ ៤៧ ._–
សមាជជាតិគឺជាស្ថាប័នតែមួយគត់ ដែលមានសិទ្ធិធ្វើវិសោធនកម្មលក្ខន្តិកៈ ឬ រំលាយគណបក្ស។ ការកោះប្រជុំសមាជជាតិ ក្នុងគោលបំណងវិសោធនកម្មលក្ខន្តិកៈ ឬរំលាយគណបក្ស ត្រូវមានការយល់ព្រមពីគណៈកម្មាធិការនាយក ក្នុងសំឡេងឆ្នោតភាគច្រើន (២/៣) នៃសមាជិកគណៈកម្មាធិការនាយកទាំងអស់ ប្រធានគណបក្ស និងប្រធាន គណៈកម្មាធិការដោះស្រាយវិវាទ និងវិន័យ។

ប្រការ ៤៨ .-
ករណីគណបក្សត្រូវរំលាយ ទ្រព្យសម្បត្តិទាំងអស់របស់គណបក្ស បន្ទាប់ពីមានការជម្រះបញ្ជីរួចរាល់ ត្រូវប្រគល់ជូនអង្គការមនុស្សធម៌នានា ដែលកំណត់ដោយសមាជចុងក្រោយរបស់គណបក្ស។

ប្រការ ៤៩ ._–
អន្តរប្បញ្ញត្តិ គឺជាប្បញ្ញត្តិសម្រាប់អនុវត្តក្នុងអន្តរកាល។ អន្តរកាល គឺដំណាក់កាលនៃការរៀបចំសម្រាប់អាណត្តិទី១របស់គណបក្ស។

ប្រការ ៥០ .-
សមាជជាតិលើកទី១របស់គណបក្សមានភារកិច្ចដូចតទៅ ៖

1. អនុម័តលើលក្ខន្តិកៈគណបក្ស ទិសដៅ និងគោលនយោបាយសំខាន់ៗ តាម រយៈការបោះឆ្នោតដោយលើកដៃ ដោយសំឡេងភាគច្រើនដាច់ខាតលើសពី ៥០% (ហាសិបភាគរយ) នៃសមាជិកចូលរួម តាមសំណើរបស់គណៈកម្មាធិការបណ្តោះអាសន្នគណបក្ស ដែលមានភារកិច្ចរៀបចំសមាជលើកទី១
2. ផ្តល់សេចក្តីទុកចិត្តដល់គណៈកម្មាធិការនាយកទី១ តាមរយៈការបោះឆ្នោតដោយលើកដៃ ដោយសំឡេងភាគច្រើនដាច់ខាតលើសពី ៥០% (ហាសិបភាគរយ) នៃសមាជិកចូលរួម
3. បោះឆ្នោតដោយតម្លាភាព យុត្តិធម៌ និងសម្ងាត់ ជ្រើសរើសប្រធានគណបក្ស ប្រធានគណៈកម្មាធិការនាយកទី១ ប្រធានគណៈកម្មាធិការដោះស្រាយវិវាទ និងវិន័យ ដោយសំឡេងភាគច្រើនដាច់ខាតលើសពី ៥០% (ហាសិបភាគរយ) នៃសមាជិកចូលរួម ក្នុងចំណោមបេក្ខជនដែលស្នើឡើងដោយ គណៈកម្មាធិការ បណ្តោះអាសន្ន។

ដំណើរការលម្អិតនៃសមាជជាតិលើកទី១មានចែងក្នុងបទបញ្ជាផ្ទៃក្នុង។

ប្រការ ៥១ .-
គណៈកម្មាធិការនាយកទី១មានសមាសភាពមកពី ៖

1. ប្រតិភូតំណាងសមាជិកថ្នាក់រាជធានី-ខេត្ត ដែលមានឃុំ-សង្កាត់ ដែលបានរៀបចំសមាជឃុំ-សង្កាត់រួចហើយ ឬបានបំពេញការងារឈានទៅរៀបចំសមាជ       ឃុំ-សង្កាត់នៅក្នុងឆ្នាំ២០១៦ ដែលមានចំនួនសរុបពី១៣ ទៅ ១៥រូប
2. ប្រតិភូតំណាងក្រុមយុវជន ៤រូប (ស្រ្តី ២រូប បុរស ២រូប)
3. ប្រតិភូតំណាងក្រុមស្រ្តី ៣រូប
4. ប្រតិភូតំណាងក្រុមប្រឹក្សាគោលនយោបាយ ក្រុមបញ្ញវន្ត និងព្រឹទ្ធាចារ្យពី    ៥ ទៅ ១៥រូប
5. ក្រោយសមាជជាតិលើកទី១ គណៈកម្មាធិការនាយកទី១ អាចសម្រេចបន្ថែមសមាជិកជាប្រតិភូតំណាងមកពីថ្នាក់រាជធានី-ខេត្តផ្សេងទៀតបាន។

ដំណើការលម្អិតនៃការជ្រើសរើសសមាសភាពគណៈកម្មាធិការនាយកទី១ មានចែងក្នុងបទបញ្ជាផ្ទៃក្នុង។

ប្រការ ៥២ .-
បទបញ្ជាផ្ទៃក្នុង គោលការណ៍គ្រប់គ្រង បទប្បញ្ញត្តិ និងលិខិតបទដ្ឋាននានារបស់ គណបក្សត្រូវស្របនឹងលក្ខន្តិកៈរបស់គណបក្សជាដាច់ខាត។

ប្រការ ៥៣ ថ្មី .- (១)
លក្ខន្តិកៈនេះត្រូវបានអនុម័តដោយគណៈកម្មាធិការបណ្តោះអាសន្ន របស់គណបក្ស ថ្ងៃទី០៩ ខែកញ្ញា ឆ្នាំ២០១៦។
លក្ខន្តិកៈនេះត្រូវបានធ្វើវិសោធនកម្មទី១ និងអនុម័តដោយសមាជជាតិ ថ្ងៃទី១០ ខែធ្នូ ឆ្នាំ២០២១។
លក្ខន្តិកៈនេះត្រូវបានធ្វើវិសោធនកម្មលើទី២ និងអនុម័តដោយសមាជជាតិ ថ្ងៃទី២៥ ខែ តុលា ឆ្នាំ២០២៥។

លក្ខន្តិកៈនេះចូលជាធរមានចាប់ពីថ្ងៃចុះហត្ថលេខាដោយប្រធានគណបក្ស។