នៅថ្ងៃទី១០ ខែកក្កដា ឆ្នាំ២០២៥ គឺជាខួប៩ឆ្នាំ នៃករណីឃាតកម្មនយោបាយមកលើ លោកបណ្ឌិត កែម ឡី ដែលជា «បិតាស្ថាបនិក» នៃគណបក្សប្រជាធិបតេយ្យមូលដ្ឋាន (គបម)។ ក្នុងវេលាដ៏ក្រៀមក្រំបំផុតនេះ គបម សូមចូលរួមជាមួយប្រជាពលរដ្ឋខ្មែរទូទាំងពិភពលោក រម្លឹកចំពោះការបាត់បង់ដ៏សោកស្ដាយបំផុត និងសូមលំឱនកាយគោរពវិញ្ញាណក្ខន្ធលោកបណ្ឌិត ដោយសេចក្ដីអាឡោះអាល័យជាទីបំផុត។
លោកបណ្ឌិតជាអ្នកវិភាគសង្គម និងនយោបាយដ៏ឆ្នើមមួយរូប ដែលបាននិយាយការពិត
ប្រាប់សាធារណជន ប្រកបដោយប្រាជ្ញាញាណ និងសេចក្តីក្លាហាន។ លោកបណ្ឌិត បានបំពេញការងារ ដោយគ្មានការនឿយណាយ ដើម្បីផ្តល់ជាចំណេះដឹងជូនប្រជាពលរដ្ឋខ្មែរគ្រប់ស្រទាប់វណ្ណៈ។
រយៈពេល៩ឆ្នាំកន្លងមកនេះ គបម បានបន្តអនុវត្ត មរតកទស្សនៈរបស់លោកបណ្ឌិត កែម ឡី
ដោយផ្ដោតសំខាន់លើការពង្រឹងលទ្ធិប្រជាធិបតេយ្យនៅមូលដ្ឋាន យុត្តិធម៌សង្គម និងការលើកកម្ពស់សិទ្ធិអំណាចរបស់ប្រជាពលរដ្ឋ។ យើងបានតស៊ូមតិតាមរយៈការចូលរួមបោះឆ្នោត, ការផ្សព្វផ្សាយតាម សហគមន៍ និងបណ្តាញសង្គម ព្រមទាំងតាមរយៈវេទិកាសាធារណៈនានា។ យើងប្ដេជ្ញាចិត្តបន្តខិតខំ ធ្វើជាគណបក្សមួយ ដែលមានគោលការណ៍ប្រជាធិបតេយ្យផ្ទៃក្នុងបក្ស កាន់តែរឹងមាំឡើងៗ។
គបម នៅតែសូមទទូច ឲ្យមានការស៊ើបអង្កេតដោយឯករាជ្យ តម្លាភាព និងពេញលេញចំពោះ ករណីឃាតកម្មនយោបាយលើលោកបណ្ឌិត កែម ឡី។ យើងកំពុងបន្តតាមដាន និងជំរុញឲ្យមានដំណើរការស្វែងរកយុត្តិធម៌មួយ ដែលប្រព្រឹត្តទៅរហូតទាល់តែ ជនដៃដល់ អ្នកសមគំនិត និងអ្នកបញ្ជា ពីក្រោយខ្នង ត្រូវបាននាំយកមកផ្តន្ទាទោស តាមច្បាប់ជាធរមាន។
គបម អំពាវនាវ ឲ្យប្រជាពលរដ្ឋខ្មែរគ្រប់រូបបន្តស្មារតីស្នេហាជាតិរបស់លោកបណ្ឌិត កែម ឡី តាមរយៈការចូលរួមតាមដានកិច្ចការសង្គម, មានភាពក្លាហានក្នុងការបញ្ចេញមតិដើម្បីប្រយោជន៍រួម និងចូលរួមតស៊ូដោយមិនរួញរា ប្រឆាំងនឹងអំពើអយុត្តិធម៌។
គណបក្សប្រជាធិបតេយ្យមូលដ្ឋាន សូមប្រកាសជាផ្លូវការ ជ្រើសរើសយកថ្ងៃទី១០ ខែកក្ដដា រៀងរាល់ឆ្នាំជា «ទិវារំឭកគុណលោកបណ្ឌិត កែម ឡី» ដើម្បីចងចាំជានិច្ច នូវគុណូបការៈដ៏ធំធេងដែល លោកបណ្ឌិត កែម ឡី បានផ្ដួចផ្ដើមគំនិត និងជ្រោមជ្រែងបង្កើត គណបក្សប្រជាធិបតេយ្យមូលដ្ឋាន៕